ភាពស្មោះត្រង់៖ សម្រាប់អ្វី ដើម្បីអ្នកណា និងដោយរបៀបណា?
ឥឡូវសង្ខេបចំណុចសំគាល់ខ្លះៗថាតើអ្វីទៅឬនរណាដែលយើងគួរផ្តល់ភាពស្មោះត្រង់ឲ្យនិងថាតើយើងត្រូវសំដែងភាពស្មោះត្រង់ដោយវិធីណា:
១. ការផ្តល់ភាពស្មោះត្រង់ចំពោះអល់ឡោះគឺជាគោលដៅ និង ជាគោលបំណងតែមួយគត់ ជាម្ចាស់ដែលអ្វីៗគ្រប់យ៉ាងនឹងត្រូវវិលត្រឡប់ទៅកាន់លោកវិញ។ មានតែធ្វើជាខ្ញុំបម្រើដ៏ល្អប្រសើរសម្រាប់អល់ឡោះប៉ុណ្ណោះទើបអាចធ្វើបាន ជាវិធីមួយដែលមានការពណ៌នាក្នុងគម្ពីរគួរអាន និងក្នុងពាក្យពេចន៍របស់អ្នកនាំសារដ៏ខ្ពង់ខ្ពស់។
២. ការផ្តល់ភាពស្មោះត្រង់ចំពោះអ្នកនាំសាររបស់អល់ឡោះ។ គេអាចធ្វើបានតាមរយៈការផ្សព្វផ្សាយ សារដ៏ថ្លៃថ្នារបស់ឥស្លាមដែលគាត់(មូហាំម៉ាត់)បានពាំនាំ និង បង្ហាញដល់យើង ទោះបីជាមានបញ្ហានិងការឈឺចាប់រាប់ពុំអស់ដែលគាត់បានជួបប្រទះក៏ដោយ។ ជាការពិតណាស់នៅក្នុងការណែនាំ សាររបស់អ៊ីស្លាម និង ការណែនាំព្យាការីជាទីស្រឡាញ់ទៅកាន់មនុស្សជាតិទាំងអស់ គួរធ្វីតាមវិធីដែលអ្នកនាំសារធ្លាប់ដើរ ពោលគឺផ្សព្វផ្សាយសារទៅតាមរបៀបដែលគាត់បានអនុវត្តន៍។
៣. ស្មោះត្រង់ចំពោះគម្ពីរគួរអាន។ យើងអាចបង្ហាញភក្ដីភាពរបស់យើងដល់គម្ពីរគួរអានបាន ដោយការអានវាឲ្យបានច្រើន អនុវត្តអ្វីដែលគម្ពីរនេះបង្រៀន ដោយចាត់ទុកវាជាប្រភពតែមួយគត់ ទាំងសម្ភារៈនិង វិញ្ញាណផ្នែកស្មារតី ដោយព្យាយាមបង្ហាញពីអារម្មណ៍ខ្ពង់ខ្ពស់ និងការពិតដ៏ពិសិដ្ឋដែលយើងចម្រាញ់ចេញពីគម្ពីរពិសិដ្ឋនេះ និងផ្តល់ដល់មនុស្សជាតិទាំងអស់។
៤. ត្រូវស្មោះចំពោះឥស្លាម ដោយសារតែវាជាអំណោយដ៏អស្ចារ្យបំផុតនៃម្ចាស់របស់យើង ប្រទានមកកាន់មនុស្សជាតិ និងជាសាសនាចុងក្រោយដែលមានភាពល្អឥតខ្ចោះ។ គេអាចសម្រេច បានភាពស្មោះត្រង់ចំពោះវា តាមរយៈកិច្ចខិតខំប្រឹងប្រែងឲ្យអស់ពីលទ្ធភាពរបស់យើងទៅតាមគន្លងឥស្លាម វាប្រៀបបាននឹងសេះចំបាំងមួយដែលរត់ក្នុងល្បឿនថេររហូតអស់ជីវិត ដោយភាពនឿយហត់។ ដូច្នេះ តម្រូវឲ្យយើងអភិវឌ្ឍន៍(បំបាត់)នូវភាពរសើបខាងក្នុង ដែលរំខានដល់យើង រហូតទាល់តែបណ្តុំការពិតពីអល់ឡោះដែលជារូបមន្តមួយសំរាប់មនុស្ស និង ការសង្គ្រោះខាងស្មារតីទាំងនេះ ជ្រាបដល់ពិភពលោកទាំងមូល ។
៥. ស្មោះត្រង់ទៅកាន់មនុស្សឆ្នើមទាំងអស់ តាំងពីសម័យកាលរបស់ព្យាការី រហូតដល់សម័យកាល របស់យើង ក្នុងមារគាឥស្លាម។ យើងអាចមានភាពស្មោះត្រង់ចំពោះពួកគេដោយការចងចាំពួកគេ និងបុព្វហេតុរបស់ពួកគេ។ តាមរយៈការបង្ហាញក្តីគោរព និងការចែករំលែកគុណតម្លៃប្រពៃរបស់ពួកគេមកកាន់មនុស្សក្នុងពិភពលោក។
៦. ត្រូវស្មោះចំពោះមនុស្សចាស់ជាងយើង ដែលបានដឹកនាំយើងក្នុងផ្លូវនៃការបម្រើឲ្យជំនឿ និង ម្ចាស់របស់យើងក្នុងសម័យទំនើបនេះ។ ពួកគេគឺជាអ្នកដែលបានបង្ហាញយើងពីរបៀបក្នុងការយល់និងអនុវត្តសេចក្ដីពិតនៃសាសនាឥស្លាមនៅក្រោមកាលៈទេសៈបច្ចុប្បន្ន។ ភក្ដីភាពរបស់យើងចំពោះពួកគេមានន័យថា ការនិយាយចិត្តនឹងចិត្តជាមួយពួកគេ ព្យាយាមដើម្បីក្លាយជាមនុស្សដែលពួកគេរំពឹងទុក ឧទាហរណ៍ ជាមនុស្សគំរូម្នាក់បម្រើឲ្យមនុស្សជាតិ ហើយចុងក្រោយអធិដ្ឋានសុំពរជ័យពីអល់ឡោះ សំរាប់ពួគគេឲ្យបានញឹកញាប់។
អំណាន
ភាពស្មោះត្រង់ពិតប្រាកដនោះគឺការអនុវត្តអ្វីមួយដោយបុព្វហេតុអល់ឡោះ
Shams at- Tabrizi បានសន្ទនាជាមួយមិត្តភក្តិរបស់គាត់ម្នាក់ដែលត្រូវបានគេស្គាល់ថាជាមនុស្សស្វែងរកភាពពេញចិត្តពីអល់ឡោះ ។ គាត់និយាយអំពីរឿងអាថ៌កំបាំងផ្សេងៗ។ ក្រោយមកបានយូរបន្តិច គាត់ក៏និយាយថា: «ប្រសិនបើនរណាម្នាក់បង្ហាញភាពស្មោះត្រង់ក្នុងមារគារបស់អល់ឡោះតែម្តងមកកាន់យើង ក្រោយមក ពួកគេប្រព្រឹត្តអំពើឃោរឃៅមកកាន់យើងមួយពាន់ដង យើងនឹងឲ្យតំលៃចំពោះភាពស្មោះត្រង់របស់គេ ហើយលើកលែងចំពោះទង្វើឃោរឃៅរបស់គេ។ នោះគឺដោយសារតែភក្តីភាពពិតប្រាកដដែលត្រូវបានធ្វើឡើងក្នុងបុព្វហេតុអល់ឡោះ គឺមានតម្លៃឥតឧបមា។ អ្នកដែលយល់ពីតម្លៃនៃភក្តីភាពពិតប្រាកដ មិនខ្វល់នឹងអំពើឃោរឃៅទេ»។ អល់ឡោះគឺជាមិត្តដែលមានភក្តីភាពបំផុត។
ទង្វើស្មោះត្រង់មួយដែលធ្វើឡើងក្នុងមារគា របស់លោក អាចយកឈ្នះលើទង្វើកខ្វក់រាប់ពាន់ដង។ នេះគឺដោយសារ ភាពស្មោះត្រង់ពិតប្រាកដក្នុងបុព្វហេតុអល់ឡោះ ហើយទង្វើក្នុងបុព្វហេតុអល់ឡោះគឺមានតំលៃលើសពីអ្វីគ្រប់យ៉ាង ដែលវាមានទំហំធំទូលាយដែលមិនអាចវាស់ស្ទង់បាន។
ប្រសិន Shams បានបង្ហាញពីសេចក្តីស្រឡាញ់ចំពោះទង្វើដ៏ស្មោះត្រង់មួយ ក្នុងចំណោមអំពើអាក្រក់រាប់ពាន់ យើងនឹងមិនអាចគណនាបានថាតើអល់ឡោះនឹងតបស្នងរង្វាន់យ៉ាងណានោះឡើយចំពោះទង្វើស្មោះត្រង់ដែលគេត្រូវទទួលបានទៅតាមមារគារបស់លោកនោះ ហើយលោកនឹងអត់ឱនទោសកំហុសដ៏ច្រើនសន្ធឹកសន្ធាប់របស់យើងជាលទ្ធផលដែលយើងមិនអាចដឹងបាន។ ឲ្យតែបុគ្គលម្នាក់បង្ហាញពីភក្តីភាពល្អឥតខ្ចោះដោយស្មោះ ម្តងក្នុងជីវិតរបស់គាត់នោះ វាគឺជាភាពជោគជ័យអស្ចារ្យទៅហើយ៖ « ឱកាសមួយក្នុងជីវិតដែលត្រូវបានបំភ្លឺតាមរយៈទំនាក់ទំនងនឹងអល់ឡោះនេះ គឺប្រសើរជាងជីវិតរស់នៅមួយលានឆ្នាំដោយគ្មានពន្លឺពិសិដ្ឋនេះ។» មានន័យថា ពន្លឺតែមួយពេលគឺតែងតែប្រសើរជាងភាពងងឹតរាប់ពាន់ម៉ោង ព្រោះថាលទ្ធផលដែលវាផ្តល់ឲ្យគឺមិនអាចវាស់វែងបានទេ។
តើព្យាការីរបស់អល់ឡោះបានបង្ហាញពីភាពស្មោះត្រង់ដោយរបៀបណា?
ព្យាការីរបស់អល់ឡោះគឺជាមនុស្សដ៏ស្មោះត្រង់មួយរូប។ គាត់តែងតែរក្សាពាក្យសន្យារបស់គាត់និងសម្រេចបាននូវអ្វីដែលគាត់បានសន្យា។ គាត់មិនដែលបំផ្លាញកិច្ចព្រមព្រាងរបស់គាត់ ហើយក៏មិនបំភ្លេចអ្នកដែលធ្លាប់បានជួយគាត់ និង សិស្សរបស់គាត់ដែរ។ គាត់គឺជាប្រភេទមនុស្សដែលតែងតែការពារមិត្តភក្តិរបស់ខ្លួន និងសួរសុខទុក្ខ ឈឺឆ្អាលនឹងពួកគេជានិច្ច។
ភាពស្មោះត្រង់គឺជាបុគ្គលិកលក្ខណៈប្រសើរបំផុតរបស់អ្នកនាំសាររបស់អល់ឡោះ ដែលគាត់បានបង្ហាញឲ្យគេឃើញ។ គាត់បានណែនាំឱ្យប្រជាជនមូស្លីមធ្វើជាមិត្តដ៏ស្មោះត្រង់ ។ សូមមើលឧទាហរណ៍មួយចំនួនពីជីវិតរបស់គាត់។ សិស្សរបស់ព្យាការីម្នាក់គឺ Abdullah Ibn Abdul Hamsa បានរៀបរាប់ថា: "ខ្ញុំបានធ្វើជំនួញមួយជាមួយនឹងអ្នកនាំសាររបស់អល់ឡោះ។ ខ្ញុំបានប្រាប់គាត់ថា «ចាំខ្ញុំទីនេះហើយ ខ្ញុំនឹងមកដល់វិញឆាប់ៗនេះ!»តែខ្ញុំបានភ្លេចនូវអ្វីដែលខ្ញុំបានសន្យា ។ បីថ្ងៃក្រោយមកនៅពេលដែលខ្ញុំចងចាំហើយត្រឡប់មកដល់កន្លែងដែលយើងណាត់ជួបគ្នា គាត់ នៅតែកំពុងរង់ចាំខ្ញុំ។
ដូចដែលយើងបានមើលឃើញពីគំរូនេះ ព្យាការីរបស់យើងគឺជាមនុស្សម្នាក់ដែលអាចទុកចិត្តបាននៅក្នុងកិច្ចការជំនួញ ហើយគាត់ជាមនុស្សស្មោះត្រង់ខ្លាំង និងជាមនុស្សដែលមិនលេបសម្តីរបស់ខ្លួនទេ គាត់មិនត្រឹមតែរង់ចាំមិត្តរបស់គាត់ចំនួនបីថ្ងៃប៉ុណ្ណោះទេ តែគាត់ថែមទាំងព្រួយបារម្ភយ៉ាងខ្លាំងពីមិត្តភក្តិរបស់គាត់ បារម្ភថាគេអាចនឹងមានបញ្ហា។
Mut'im Ibn Adiyy គឺជាមេដឹកនាំអជំនឿម្នាក់ក្នុងចំណោមកុលសម្ព័ន្ធ Quraysh ។ នៅពេលដែលអ្នកនាំសាររបស់អល់ឡោះ បានធ្វើដំណើរពីតំបន់ Taif មកផ្ទះវិញ សត្រូវរបស់គាត់បានព្យាយាមរារាំងគាត់មិន ឲ្យចូលទីក្រុង Mecca ។ ក្រោយពីបានដឹងអំពីផែនការនេះ ព្យាការីរបស់អល់ឡោះបានស្នើសុំការការពារពីមេដឹកនាំក្នុងទីក្រុង Mecca ដទៃទៀត។ ប៉ុន្តែពួកគេបានបដិសេធសំណើរបស់គាត់ មានតែ Mur'im ទេ ដែលបំពាក់កំលាំងឲ្យកូនប្រុសគាត់ និង ជួយការពារព្យាការីរបស់យើងឲ្យចូលក្នុងទីក្រុងដោយមានសុវត្ថិភាព។
ជាច្រើនឆ្នាំកន្លងផុតទៅ Mut'im បានរួមដៃជាមួយក្រុមអជំនឿប្រយុទ្ធប្រឆាំងនឹងពួកមូស្លីមនៅក្នុងសមរភូមិ Badr(ឈ្មោះតំបន់មួយ) និងត្រូវបានគេសម្លាប់។ លោក Hassan ជាអ្នកនិពន្ធកំណាព្យមួយរូបដែលព្យាការីពេញចិត្ត បានសរសេរកំណាព្យមួយបន្ទាប់ពីការស្លាប់របស់ Mut'im ដោយសរសើរគាត់ចំពោះការការពារព្យាការីរបស់អល់ឡោះជាច្រើនឆ្នាំមកនេះ។ ព្យាការីពេញចិត្តនឹងភក្តីភាពដែលមនុស្សធ្វើមក កាន់គាត់។ បើយើងចង់ដឹងពីអារម្មណ៍ពិតរបស់ព្យាការីចំពោះភក្តីភាព យើងគប្បីពិចារណាពីព្រឹត្តការណ៍មួយ។ នៅពេលជនមូស្លីមបានកំពុងពិភាក្សាគ្នាថាតើគួរធ្វើបែបណាចំពោះអ្នកទោសសង្គ្រាមពីសមរភូមិ Badr ព្យាការីបាននិយាយថា: «ប្រសិនបើ Mut'im Ibn Adiyy នៅមានជីវិត និងប្រសិនបើគាត់សំណូមពរ ឲ្យដោះលែងអ្នកទោសទាំងនោះ ខ្ញុំនឹងធ្វើតាមសំណើររបស់គាត់ដោយគ្មានលក្ខខណ្ឌ។»។
ព្យាការីរបស់យើងក៏មានភក្តីភាពជាមួយនឹងសម្ព័ន្ធមិត្តរបស់គាត់ដែរ។ ឧទាហរណ៍ កុលសម្ព័ន្ធ របស់ Khuza'a ដែលបានចងសម្ព័ន្ធមិត្តជាមួយនឹងជនមូស្លីមក្នុងសន្ធិសញ្ញាសន្តិភាព Hudaybiya ត្រូវបានវាយប្រហារដោយកុលសម្ព័ន្ធ Bakr ជាកុលសម្ព័ន្ធដែលចងសម្ព័ន្ធមិត្តជាមួយក្រុម Quraysh ក្នុងសន្ធិសញ្ញាមួយ ។ តាមពិតទៅ ប្រជាជន Quraysh គឺជាមេក្លោង និងជាអ្នកគាំទ្រពីក្រោយការវាយប្រហារនេះ។ មេដឹកនាំ កុលសម្ព័ន្ធ Khuza'a បានមកជួបជាមួយព្យាការីដើម្បីពិភាក្សាបញ្ហានេះ បន្ទាប់មក ព្យាការីក៏បានចាប់ ផ្តើមរៀបចំយុទ្ធសាស្ត្រ និងកងទ័ពភ្លាម។ ព្រឹត្តិការណ៍នេះត្រូវបានគេស្គាល់នៅក្នុងសៀវភៅប្រវត្តិសាស្រ្ត វាជាបុព្វហេតុនៃការយកឈ្នះ Mecca ។ ដូច្នេះព្យាការីរបស់យើងមិនបានទុកសម្ព័ន្ធមិត្តរបស់គាត់តែម្នាក់ឯងនៅពេលពួកគេកំពុងជួបវិបត្តិនោះទេ។
លើសពីនេះទៅទៀត ព្យាការីរបស់យើងក៏មានភាពស្មោះត្រង់ចំពោះអ្នកដែលជួយសិស្សរបស់គាត់ផងដែរ ។ ធ្លាប់មានពេលមួយ អ្នកនាំសារស្តេច Abyssinian បានមកជួបជាមួយនឹងអ្នកនាំសាររបស់អល់ឡោះ។ ព្យាការីយើងទទួលស្វាគមន៍ ពួកគេយ៉ាងកក់ក្តៅ។ សិស្សរបស់គាត់ខ្លះនិយាយទៅកាន់គាត់ថា : «ឱព្យាការីរបស់អល់ឡោះ! សូមសំរាកចុះ! ពួកខ្ញុំអាចទទួលស្វាគមន៍ពួកគាត់បានយ៉ាងល្អបំផុត!»
ប៉ុន្ដែគាត់បានឆ្លើយតបមកវិញថា៖ «ពួកគេបានផ្តល់កន្លែងដែលមានសុវត្ថិភាពសម្រាប់សិស្ស)ខ្ញុំ ដែលបានធ្វើអន្តោប្រវេសន៍មកកាន់ទឹកដីរបស់ពួកគេ និងបានស្វាគមន៍ពួកគេយ៉ាងរាក់ទាក់។ ពេលនេះ ខ្ញុំក៏ត្រូវធ្វើដូចគ្នាដែរ។»
ព្យាការីរបស់យើង បានទទួលស្វាគមន៍កុលសម្ព័ន្ធដែលមកធ្វើទស្សនកិច្ចនៅ Medina យ៉ាងកក់ ក្តៅបំផុត។ សម្រាប់បុគ្គលតំណាងកុលសម្ព័ន្ធរបស់ខ្លួនដែលបានមកពីតំបន់ឆ្ងាយ ដើម្បីមករៀនពីឥស្លាម ព្យាការីបានរៀបចំ ផ្ទះសំណាក់ដោយផ្ទាល់សម្រាប់ឲ្យពួកគេស្នាក់អាស្រ័យ។ គាត់ទទួលពួកគេយ៉ាងកក់ក្តៅ គាត់បានចាត់តាំងគ្រូសំរាប់ឲ្យទៅបង្រៀនពួកគេ និង ផ្តែផ្តាំមិត្តរបស់គាត់ ប៉ុន្មាននាក់ដើម្បីផ្តល់ជាជំនួយសម្រាប់ពួកគេផងដែរ។ នៅពេលដែលពួកគេត្រឡប់ទៅកុលសម្ព័ន្ធរបស់ពួកគេវិញ គាត់បានផ្តល់អំណោយខ្លះ ដូចជា សំលៀកបំពាក់ថ្មី និងអាហារសម្រាប់ធ្វើដំណើរទៀតផង។ គាត់ជូនពរពួកគេឲ្យត្រឡប់ទៅផ្ទះវិញដោយមានសុវត្ថិភាព ដោយសង្ឃឹមថា ពួកគេនឹងមិនបំភ្លេចពីអ្វីដែលពួកគេទទួលបានពីដំណើរនេះ ដោយសារតែដំណើរពួកគេលើកនេះគឺ ដើម្បីមកសិក្សាពីសាសនាឥស្លាមពីគាត់។
- បានបង្កើតនៅលើ ។