"Domosdoshmëria e Dialogut Ndërfetar e Ndërkulturor për Paqen Botërore"
Ditën e shtunë më 26 Maj 2007, në ambientet e Hotel Tirana International, u organizua simpoziumi me temë "Domosdoshmëria e dialogut ndërfetar dhe ndërkulturor për paqen botërore". Simpoziumi i organizuar nga një bashkëpunim i gjerë i Komunitetit Musliman të Shqipërisë, Kryegjyshatës Botërore Bektashiane, Shtëpisë Botuese PRIZMI, Institutit të Kontakteve Kulturore dhe Institutit për Mirëkuptim dhe Dialog, mblodhi rreth vetes intelektualë, historianë, sociologë, gazetarë, etj.
Në fjalën e hapjes, krerët e institucioneve fetarë dhe përfaqësues të tyre folën rreth konceptit të paqes që ndodhet në themelin e çdo feje dhe për rëndësinë e kultivimit të saj tek besimtarët e feve të ndryshme. Kryetari i Akademisë së Shkencave, Prof. Dr. Ylli Popa, në fjalën e tij përshëndetëse theksoi tolerancën dhe mirëkuptimin e ndërsjellë ndërfetar në vendin tonë dhe shprehu mbështetjen që u duhet dhënë vazhdimësisë së kësaj tolerance dhe dialogu ndërfetar.
Profesori i njohur nga Muhamed Pirraku, i cili foli rreth kontributit të Fethullah Gylenit në dialogun ndërfetar e ndërkulturor, në fjalën e tij theksoi duke cituar Gylenin se "Dialogu ndërfetar është sot një domosdoshmëri dhe hapi i parë në vendosjen e tij është harrimi i së kaluarës, injorimi i argumenteve polemizuese dhe dhënia përparësi pikave të përbashkëta, të cilat janë më të shumta se polemikat".
Profesor Pirraku në fund të kumtesës së tij, propozoi që "Lëvizja e Gylenit" dhe kontributi i tij në fushën e dialogut ndërfetar e ndërkulturor, të futet në programet e universiteteve shqiptare si objekte studimi.
Temat e referuara në simpozium ishin të një rëndësie të veçantë jo vetëm për rajonin, por edhe më gjerë. Ndër to mund të veçojmë: "Globalizimi dhe dialogu ndërkulturor", "Arti i të bashkëjetuarit në shek. XXI", "Kontributi i fesë për paqen botërore", "Kontributi i F. Gylenit në dialogun ndërfetar e ndërkulturor", "Ruajtja dhe promovimi i tolerancës fetare në Shqipëri është investim për sigurinë tonë kombëtare", "Roli i elitave fetare në dialogun dhe tolerancën e ndërsjelltë religjioze në Shqipëri", "Dialogu ndërfetar në Ballkan përgjatë historisë", "Nevoja e dialogut ndërfetar e ndërkulturor për arritjen dhe vazhdimësinë e stabilitetit në Ballkan", etj.
Në simpozium e ndërtuar me dy panele, moderatorë ishin dy emra mjaft të njohur, Prof Dr. Pëllumb Xhufi, njëkohësisht sekretar i LSI dhe Prof. Dr. Gazmend Shpuza. Referues në këtë simpozium ishin deputeti Ferdinand Xhaferi, Dr. Milazim Krasniqi nga Kosova, historiani i njohur po nga Kosova Prof. Dr. Muhamed Pirraku, sociologu Prof. Dr. As. Gjergji Sinani, shkrimtari i njohur Agron Tufa, studiuesi nga Maqedonia Dr. Qani Nesimi, studiuesi i çështjeve të sigurisë dhe atyre fetare Xhavit Shala dhe gazetari Mentor Beqa.
- Publikuar më .